Біяграфія
Цімохаў Сяргей Аляксандравіч (08.09.1960, в. Кротаў Калінкавіцкага р-на Гомельскай вобл. – 09.10.2012, г. Мінск), беларускі мастак. Скончыў Мінскае мастацкае вучылішча (1979), Беларускі тэатральна-мастацкі інстытут (1984). З 1986 г. – на віцебскім камбінаце «Мастацтва», з 1989 г. – галоўны мастак г. Полацка, у 1991–2000 гг. з'яўляўся дырэктарам, мастаком галерэі «Рыса» ў Полацку. З 2007 года – намеснік старшыні па выставачнай дзейнасці ў Беларускім саюзе мастакоў. Член Беларускага саюза мастакоў (1990).
Працаваў у станковым і манументальным жывапісе, а таксама ў графіцы. Сярод работ: маляўнічыя «Несці крыж» (1989), «Канцэрт старадаўняй музыкі» (1989), «Рытуальнае шэсце-7» (1999), «Цень Вялеса» (2000); дыптыхі «Таямніца купальскай ночы» (2002), «На Дзяды» (2004), «Грацыя-1» (2007); графічныя лісты «Назіраючы зацьменне Сонца-2» (1999) і інш.
Творы мастака знаходзяцца ў Нацыянальным мастацкім музеі, Музеі сучаснага выяўленчага мастацтва (г. Мінск), фондзе Беларускага саюза мастакоў (г. Мінск), фондзе Міністэрства культуры Расіі (г. Масква), Музеі М. Шагала (г. Віцебск), Мастацкай галерэі Г. Х. Вашчанкі (г. Гомель), Полацкім мастацкім музеі, галерэі "Galeria sztuki Katarzyny Napiórkowskiej" (г. Варшава), галерэі "Walentowski Galerien" (г. Дрэздэн), галерэі "Аxel Babke" (г. Дрэздэн), галерэі "Аlla Bulyanskaya "(г. Масква, г. Лондан), а таксама ў прыватных калекцыях на радзіме і за мяжой.
ЛІТАРАТУРА
1. Цыбульский, М. Л. Тимохов Сергей Александрович / М. Л. Цыбульский // Регионы Беларуси : энцикл. : в 7 т. / редкол.: Т. В. Белова (гл. ред.) [и др.]. — Мн. : Беларус. Энцыкл. імя П. Броўкі, 2011. — Т. 2 : Витебская область. Кн. 2. — С. 509.
2. Цімохаў Сяргей Аляксандравіч // Беларускі саюз мастакоў : 1938—1998 : энцыкл. даведнік / аўт.-склад. Б. А. Крэпак [і інш.]. — Мн. : ВТАА «Кавалер Паблішэрс», 1998. — С. 575. — На беларус. і англ. мовах.
СПАСЫЛКІ
Каваленка А. Сяргей Цімохаў. Багі фальшывыя і сапраўдныя