Біяграфія

Дундзін Мікалай Мікалаевіч (28.10.1950, в. Чырвоны Бор Чавускага р-на Магілёўскай вобл.), беларускі мастак. Скончыў мастацка-графічны факультэт Віцебскага дзяржаўнага педагагічнага інстытута (1973). Вучыўся ў І. Сталярова, Ф. Гумена. Удзельнік мастацкіх выстаў з 1974. Адзін з заснавальнікаў творчага аб'яднання «Квадрат». Член Беларускага саюза мастакоў (1991). Жыве ў Віцебску.

Працуе ў жывапісе і графіцы. У працах пераважаюць філасофскія, сімвалічныя, метафарычныя вобразы, біблейскія і гістарычныя матывы, метафізічныя інтэрпрэтацыі рэчаіснасці.

Сярод работ: «Дарога да храма» (1990), «Палонная Нептуна» (1993), «Чароўная флейта» (1994), «Песня песняў» (1996), «Я прыйшоў у сад» (2001), «Залаты веер» (2010), дыптых «Спас» (1993), трыпціхі «Бабіна лета» (1979), «Анёлы» (1993), серыі «Ікар» (1975), «Беларускія студні» (1983), «Метамарфозы нараджэння Зямлі» (1988), «Час збіраць камяні» (1992–1993).

Аўтар праектаў музейных экспазіцый у музеі прыроды Бярэзінскага біясфернага запаведніка (1982), музеі 39-й Арміі СШ № 32 г. Віцебска (1985), музеі Віцебскага водаправода (1994), экспазіцыі «Прырода Віцебскага краю» Віцебскага абласнога краязнаўчага музея (2003) і інш.

Работы знаходзяцца ў Віцебскім абласным краязнаўчым музеі.

ЛІТАРАТУРА

1. Дундзін Мікалай Мікалаевіч // Беларускі саюз мастакоў : 1938—1998 : энцыкл. даведнік / аўт.-склад. Б. А. Крэпак [і інш.]. — Мн. : ВТАА «Кавалер Паблішэрс», 1998. — С. 187. — На беларус. і англ. мовах.

2. Цыбульский, М. Л. Дундин Николай Николаевич / М. Л. Цыбульский // Регионы Беларуси : энцикл. : в 7 т. / редкол.: Т. В. Белова (гл. ред.) [и др.]. — Мн. : Беларус. Энцыкл. імя П. Броўкі, 2010. — Т. 2 : Витебская область. Кн. 1. — С. 412.

СПАСЫЛКІ

 Дундин Николай на портале «Gorod.Vitebsk.by»