Біяграфія

Мастак – гэта маг, вялікае сэрца. Ён здабывае прыгажосць, адшуквае свежасць ва ўсім, падпарадкоўвае сабе стыхію.

Марк Шагал

Віцебская абласная бібліятэка

імя У. І. Леніна

Біяграфія

Салаўёў Аляксандр Аляксандравіч (13.09.1926, в. Салані Ленінградскай вобл., Расія – 23.05.2021, г. Віцебск), беларускі мастак тэатра. Заслужаны дзеяч мастацтваў БССР (1982). Скончыў Ленінградскае Вышэйшае мастацка-прамысловае вучылішча імя В. І. Мухінай (1957), Беларускі тэатральна-мастацкі інстытут (1965). З 1965 года – у Віцебску. У 1977–1990 гг. – галоўны мастак Беларускага дзяржаўнага акадэмічнага драматычнага тэатра імя Я. Коласа. Член Беларускага саюза мастакоў (1966). Жыў ў Віцебску.

Удзельнік Вялікай Айчыннай вайны. У 1943-1944 гг. удзельнічаў у партызанскім руху, з 1944 года знаходзіўся ў дзеючай арміі. Быў узнагароджаны Ордэнам Чырвонай Зоркі, а таксама памятнымі медалямі ў гонар Перамогі ў Вялікай Айчыннай вайне.

Працаваў ў тэатральна-дэкарацыйным мастацтве, станковым жывапісе і графіцы.

Аформіў больш за 100 спектакляў, сярод якіх: «Сымон-музыка» паводле Я. Коласа (1976), «Кастусь Каліноўскі» У. Караткевіча (1978), «Парог» (1982), «Радавыя» (1984) А. Дударава, «Рамэа і Джульета» У. Шэкспіра (1986), «Мудрамер» М. Матукоўскага (1988), «Каварства і любоў» А. Петрушэўскай (1989) і інш.

Аўтар жывапісных работ: «Дзве птушкі» (1984), «Накцюрн» (1998), «Водбліскі» (2003), «Экспромт» (2008), «Папярэджанне» (2008), «Настальгія» (2008), «Рэквіем па дрэве» (2008), «Мара» (2008), «Кампазіцыя» (2009), «Галактыка» (2010), «Метамарфозы» (2010); трыпціха «Прысвячэнне жанчыне» (2007); цыклаў «Фарбы зямлі» (1974–1985), «Русь» (1975–1985), «Тэатр» (1977–1980), «Космас» (1978–1982) і інш.

У 2017 годзе Аляксандр Салаўёў узнагароджаны ордэнам Францыска Скарыны за шматгадовую плённую працу, значны асабісты ўклад у развіццё мастацтва і культуры Беларусі.

Памёр 23 мая 2021 года. Пахаваны на Мазурынскіх могілках у Віцебску.

ЛІТАРАТУРА

Цыбульский, М. Л. Соловьев Александр Александрович / М. Л. Цыбульский // Регионы Беларуси : энцикл. : в 7 т. / редкол.: Т. В. Белова (гл. ред.) [и др.]. — Мн. : Беларус. Энцыкл. імя П. Броўкі, 2011. — Т. 2 : Витебская область. Кн. 2. — С. 481.

СПАСЫЛКІ

Анцімонаў Л. «Версіі» сваёй мадэлі