Мастакі Віцебшчыны

Мастак – гэта маг, вялікае сэрца. Ён здабывае прыгажосць, адшуквае свежасць ва ўсім, падпарадкоўвае сабе стыхію.

Марк  Шагал

Віцебская абласная бібліятэка

імя У. І. Леніна

VLIB

Біяграфія

 

Баранкоўская Святлана Аляксандраўна (08.02.1965, г. Людзінава Калужскай вобл., Расія), беларуская мастачка. Скончыла Віцебскі тэхналагічны тэхнікум (1984), факультэт мастацкага праектавання вырабаў тэкстыльнай і лёгкай прамысловасці Віцебскага дзяржаўнага тэхналагічнага ўніверсітэта (1997). Член Беларускага саюза дызайнераў (2000). Член Беларускага саюза мастакоў (2003). Жыве ў Віцебску.

Працуе пераважна ў мастацкім тэкстылі, у галіне ручнога гладкага ткацтва, стварае сцэнічныя касцюмы, піша кампазіцыі ў тэхніцы алейнага жывапісу.

Цэнтральнае месца ў творчасці займаюць тэмы, звязаныя з гісторыяй Беларусі, паданнямі, легендамі, фальклорам, этнаграфічнай спадчынай народа, увасабленнем вобразаў вядомых гістарычных асоб і нашых сучаснікаў.

Тэкстыльныя кампазіцыі вызначаюцца эксперыментальным характарам, вытанчанасцю і выразнасцю каляровага і пластычнага рашэння, спалучэннем дэкаратыўнасці і трохвымернасці, знакавым характарам вобразаў, лаканічнасцю і мінімалізмам выкарыстання выяўленчых сродкаў.

Сярод работ: тэкстыльныя кампазіцыі «Сонца ў шкле» (1998), «Берагіня» (2002), «Жыцень» (2004), «Маці Боская Вострабрамская» (2005), «Сасновы бор на гары Рагнеды» (2010); серыі работ «Спрадвечнае» (1999), «Альгердавым шляхам» (2002), «У мяне было жыццё ...» (2004); партрэты В. Быкава (2008), Р. Барадуліна (2007), Я. Купалы (2008–09), Я. Драздовіча (2008–09).

У жывапісе дамінуюць фігуратыўнасць, рэалістычная канкрэтнасць адлюстраванага матыву, эмацыянальная выразнасць вобраза. Цэнтральнае месца належыць пейзажным кампазіцыям: «Свята-Мікалаеўскі кафедральны сабор» (2007), «Касцёл Святога Антонія» (2007), «Селішчанскі касцёл Святой Веранікі» (2006), «Друйскі касцёл» (2008), «Сядзіба Плятэраў у Опсе» (2009) і нацюрмортам.

Работы знаходзяцца ў прыватных калекцыях Беларусі, Украіны, Расіі, Латвіі, Эстоніі, Германіі, Ізраіля, Віцебскім абласным краязнаўчым музеі, цэнтры імя Язэпа Драздовіча.

 

ЛІТАРАТУРА

1.Святлана Баранкоўская // Саюз творцаў [Выяўленчы матэрыял] = A Union of creators : фотаальбом / уклад. і аўт. тэксту М. Цыбульскі ; аўт. уступ. У. Андрэйчанка ; фат. В. Балоціна, М. Цыбульскага. – Мн. : Беларусь, 2005. – С. 21. – На беларус. і англ. мовах.

2.Цыбульский, М. Л. Баранковская Светлана Александровна / М. Л. Цыбульский // Регионы Беларуси : энцикл. : в 7 т. / редкол.: Т. В. Белова (гл. ред.) [и др.]. – Мн. : Беларус. Энцыкл. імя П. Броўкі, 2010. – Т. 2 : Витебская область. Кн. 1. – С. 32–33.

 

CПАСЫЛКІ

arrow В Белостоке открылась выставка произведений белорусских художников «Лёсы нашых народаў»

arrow «Віцебскі крэатыў TUT». У горадзе над Дзвіной прыдумалі тканую азбуку для дзетак

arrow У галерэі TUT.BY распачалася выстава «У пошуках Атлантыды»

arrow «У гэтай выставе – сэрца«