Мастакі Віцебшчыны

Мастак – гэта маг, вялікае сэрца. Ён здабывае прыгажосць, адшуквае свежасць ва ўсім, падпарадкоўвае сабе стыхію.

Марк  Шагал

Віцебская абласная бібліятэка

імя У. І. Леніна

VLIB

Біяграфія

 

Сталяроў Іван Міхайлавіч (20.05.1923, г. Віцебск – 27.09.2015, г. Магілёў), беларускі акварэліст, графік, педагог. Вучыўся ў Віцебскім мастацкім вучылішчы (1939–1940). Скончыў Мінскае мастацкае вучылішча (1951), факультэт графікі Маскоўскага паліграфічнага інстытута (1960). Працаваў выкладчыкам Віцебскага мастацка-графічнага педагагічнага вучылішча (1951–1958), выкладаў на мастацка-графічным факультэце Віцебскага дзяржаўнага педагагічнага інстытута імя С. М. Кірава (1959–1985), дацэнт кафедры малюнка і жывапісу ВДПІ (1979). Стаяў ля вытокаў Віцебскай школы акварэлі, з'яўляецца аўтарам спецыяльных вучэбных праграм, дапаможнікаў, у якіх сістэматызавана методыка работы акварэльнымі фарбамі. Заслужаны дзеяч мастацтваў Беларусі (1993). Член Беларускага саюза мастакоў (1967). Жыў у Віцебску, у 2011 г. пераехаў у Магілёў.

Творчая і педагагічная праца адзначана медалём «За заслугі ў выяўленчым мастацтве», нагрудным знакам «Выдатнік асветы СССР», 40 ганаровымі граматамі. Удзельнік Вялікай Айчыннай вайны. За удзел у баявых дзеяннях узнагароджаны 19 урадавымі медалямі, сярод іх – два «За адвагу», «Партызану Айчыннай вайны», «За Перамогу над Германіяй», ордэнам Айчыннай вайны І ступені.

Сярод вучняў І. М. Сталярова больш за сотню з'яўляюцца сябрамі прафесійных саюзаў мастакоў, 75 з іх выбралі акварэль у якасці асноўнай мастацкай тэхнікі.
Працаваў ў акварэлі, станковай і кніжнай графіцы.

Асноўная тэматыка твораў: сельскія, гарадскія і індустрыяльныя пейзажы. Аўтар шэрагу станковых кампазіцый на ваенную тэму, а таксама станковых ілюстрацый. Выканаў звыш за 1500 творчых работ (акварэль, графіка).

Браў удзел у творчых паездках па Латвіі, Літве, Паўночным Каўказе і Арменіі.

Сярод работ: серыі акварэляў «Новабудоўлі Віцебска» (1958–1961), «Браслаўшчына» (1963–1965), «Па Паўночным Каўказе» (1974), «Ушацкія эцюды» (1974), «Па Арменіі» (1980), «Віцебшчына – край блакітных азёр» (1984), «Час навальніц» (1987); кампазіцыі «Заходняя Дзвіна» (1961), «Юр'ева Горка» (1961), «Здраўнёва» (1963), «Першыя замаразкі» (1968), «Калі ноч горад накрывае» (1978), «Гарадская ўскраіна» (1980), «Возера Аслепна» (1993), «Пейзаж у ваколіцах в. Вымна» (1998), «Змярканне» (1998), «Дрэвы каля ракі» (1999), «Дажджлівыя хмары» (1999), «Перад навальніцай» (1999), «Рэчка Ула» (2003), «Летні пейзаж» (2003), «Волжская вольніца» (2004) і інш.

Творы знаходяцца ў Нацыянальным мастацкім музеі, віцебскіх мастацкім і краязнаўчым музеях, Полацкім музеі, музеі М. П. Шмырова, прыватных калекцыях у Расіі, Германіі, Галандыі, Беларусі і інш.

 

ЛІТАРАТУРА

Іван Сталяроў : ля вытокаў Віцебскай школы акварэлі : каталог / Віцебская абласная бібліятэка імя У. І. Леніна, Аддзел літаратуры па мастацтве ; склад. В. А. Дарафеева, М. Л. Цыбульскі. — Мн., 2013. — 108 с. : іл.

 

СПАСЫЛКІ

arrow Выстава стваральніка беларускай акварэлі адчынілася ў Магілёве: фота

arrow Открытие персональной выставки И. Столярова в Могилевском областном художественном музее имени П.В. Масленикова