Біяграфія
Шамшур Вячаслаў Вячаслававіч (20.08.1942, в. Пціцкія Міёрскага р-на Віцебскай вобл.), беларускі мастацтвазнаўца, графік. Скончыў мастацка-графічны факультэт Віцебскага дзяржаўнага педагагічнага інстытута імя С. М. Кірава (1970), аспірантуру Інстытута мастацтвазнаўства, этнаграфіі і фальклору АН БССР (1978). Кандыдат мастацтвазнаўства (1980), прафесар (1993). З 1970 г. выкладае ў Віцебскім дзяржаўным педагагічным інстытуце (зараз ВДУ імя П. М. Машэрава), загадчык кафедры мастацтваў (1986–2005), прафесар кафедры дызайну (2006). Член Беларускага саюза мастакоў (1993).
Працуе ў розных тэхніках станковай графікі. Асноўныя работы выкананыя ў тэхніцы лінагравюры і пастэлі.
Сярод твораў: «Пакроўскі сабор. Вячэрняя літургія» (1996), «Браслаўшчына. Бяльмонты» (1999), «Акно майстэрні» (2004), «Перад святам Тройцы» (2004), «Вечар у Бычках» (2006), «Веліч мінулага» (2006), «Віленскае барока. Глыбокае» (2007), «Сосны Прыдзвіння» (2008), «Калодзеж каля дарогі» (2009), «Блакітная печ» (2009); серыі «Дарога на Міёры» (1986–1994), «Віцебск і Віцебшчына» (1988–1996) і інш.
Даследуе гісторыю беларускага мастацтва першай паловы ХХ стагоддзя, творчасць сучасных віцебскіх мастакоў. Аўтар манаграфіі «Святкаванне рэвалюцыі» (Мн., 1989), раздзела ў шасцітомным выданні «Гісторыя беларускага мастацтва» (Т. 4., Мн., 1991), артыкулаў у «Энцыклапедыі літаратуры і мастацтва Беларусі», перыядычным друку.
ЛІТАРАТУРА
1. Цыбульский, М. Л. Шамшур Вячеслав Вячеславович / М. Л. Цыбульский // Регионы Беларуси : энцикл. : в 7 т. / редкол.: Т. В. Белова (гл. ред.) [и др.]. — Мн. : Беларус. Энцыкл. імя П. Броўкі, 2011. — Т. 2 : Витебская область. Кн. 2. — С. 598.
2. Шамшур Вячаслаў Вячаслававіч // Беларускі саюз мастакоў : 1938—1998 : энцыкл. даведнік / аўт.-склад. Б. А. Крэпак [і інш.]. — Мн. : ВТАА «Кавалер Паблішэрс», 1998. — С. 606. — На беларус. і англ. мовах.
3. Вячаслаў Шамшур // Саюз творцаў [Выяўленчы матэрыял] = A Union of creators : фотаальбом / уклад. і аўт. тэксту М. Цыбульскі ; аўт. уступ. У. Андрэйчанка ; фат. В. Балоціна, М. Цыбульскага. — Мн. : Беларусь, 2005. — С. 136. — На беларус. і англ. мовах.
4. Вячаслаў Шамшур. Класіка сучаснага пейзажа : каталог / Віцебская абласная бібліятэка імя У. І. Леніна, Аддзел літаратуры па мастацтве ; склад.: В. А. Дарафеева, М. Л. Цыбульскі. – Мінск : Нацыянальная бібліятэка Беларусі, 2014. – 11с.
СПАСЫЛКІ
Выставка работ Вячеслава Шамшура «Свет Пастэлі»
Художественная выставка В. В. Шамшура «Свет пастэлі»